KAN夫人。生活雜記: [成長日記] 公園小風波

2018年11月8日星期四

[成長日記] 公園小風波

做在職媽媽時，多數都只有晚上可陪伴小朋友，
活動空間當然是家中，對象是家庭成員，偶有小爭吵但都好快平息。
但自從做了全職媽媽後，原來要處理的不只是自己的孩子！
我每天都會帶丁丁去公園放電，
公園遊樂場是公家地方，
當然有著不同的人來來往往，包括大人小孩老人家，
每一日都會發生令我「大開眼界」的事！

有一日下午，如常帶丁丁到附近的「千秋公園」玩，
因這公園是可步行範圍內唯一一個有得打千秋（盪鞦韆）的公園。

去到，比往常多小朋友在等待鞦韆，
丁丁說很想玩，好好好，要排隊等喔！
我們選了一邊去排隊，
除左玩緊的小女孩外，也有兩三個在排隊，
但正在玩的兩個小女孩沒有意欲要離開⋯⋯
我同丁說「要排隊呀，小朋友早來早玩，我們遲了點，排隊等會就可以玩了。」

過了好一會，丁丁開始沒耐性，
說為什麼別人玩這麼久都不走⋯⋯
正當我要跟丁丁說話時，
有位嬲嬲媽媽對那兩個玩緊的小女孩訓話「好走喇！你地玩左好耐喇！！」
我以為是她們的媽媽，不以為然。
繼續默默等待⋯⋯

原來這位嬲嬲媽媽不是小女孩的媽媽！！！！！
嬲嬲媽媽是我前面排緊隊的小朋友媽媽，
她為自己小朋友而出聲叫她們下來⋯⋯
及後，小女孩的真正媽媽有過來但好快又走開⋯⋯
結果，嬲嬲媽媽在無所謂媽媽走開後，
又繼續出聲比說話小女孩聽：
「你媽唔教你，我教你啦，公園係大家一齊玩，你地玩左咁耐，其他小朋友就等足咁耐⋯⋯」
「公園係公家地方，唔係一個人獨佔架」
「你地無家教，第時大個點出黎社會」
「睇你媽都無乜讀書才教到你地咁」
兩位小女孩無動於衷繼續你有你講、我有我玩⋯⋯
無所謂媽媽在老遠跟朋友們談天說地⋯⋯

我都覺得果兩位小女孩玩得太耐，
但點解唔係出聲同無所謂媽媽傾下，睇下小女孩可唔可以讓比下一個小朋友，
又或者叫小朋友開聲請小女孩分享？

其實應該要點做先最好呢？

但，我認為最起碼唔係一個家長去話一個小朋友⋯⋯

我真的覺得一個成年人，要特登開聲講說話明嘲暗諷一位小朋友，又何以顯得自己有家教（或身教）？

而有些媽媽，又真的太放任小朋友在公園搗亂，
帶去公園，然後自己玩手機，或同朋友說說說，
小朋友都跑去推撞別人、打尖、或跑到水池邊玩⋯⋯
又真的無所謂？

這些我都是非常難以理解⋯⋯

事件最後我都不知道發展如何，
因丁丁已放棄等待，跑去玩滑梯，開開心心跟細細佬玩SIRSIR～～
我當然是跟班媽媽，與他們一起玩得哈哈笑，
才不枉來公園嘛！

回家途中，我跟丁丁說
「公園是小朋友一起玩既地方，
不可以霸住一樣遊戲設施，如果有小朋友想玩，
我地可以玩一陣就讓比人玩，咁就有禮貌同有公德心咧！
公園仲有其他野玩，玩下呢樣玩下果樣，咁咪好開心囉～」